Татарстанда экологик белем бирү буенча беренче онлайн-дәрес узды

2020 елның 9 апреле, пәнҗешәмбе

«Чиста болыннар» дәүләт табигать тыюлыгы хезмәткәрләре балаларга табигатьне һәм биоресурсларны ни өчен сакларга кирәклеге турында онлайн режимда сөйләде.

Бөтен теләгән кеше катнаша ала торган, турыдан-туры эфир форматында,  кошларның төрлелеген һәм санын саклап калу турында сөйләделәр.

Дәрес өч өлештән торды: лекция, табышмаклар, викториналар һәм «Тавыш буенча кошны тап» уенын үз эченә алган интерактив өлеш, өченче өлеш - «Минем кошым» оригами техникасы буенча мастер-класс.

Шулай ук балаларга республикада башланган «Парклар маршы -2020» акциясе һәм  аның кысаларында рәсем конкурсы узуы турында сөйләделәр. Тыюлык хезмәткәрләре актив катнашучыларга һәм җиңүчеләргә ТР Биоресурслар буенча дәүләт комитетыннан  грамоталар һәм призлар тапшырачак.