Алексеевск районында бүрекле матур кошны очраттылар.
Дәүләт комитетының районара бүлеге хезмәткәрләре белән Татарстан Республикасының Алексеевск районы территориясендә Кызыл китапка кертелгән Һөдһөд (Upupa epops) белән очрашу теркәлде. Гадәттә, апрель аенда килә.
Бу кош күгәрченнән кечерәк, күзгә ташлана торган ачык төстә. Гәүдәсе кызгылт-сары, күкрәге ал. Башында кара очлы каурыйлары булган зур җилпәзәсыман бүреге бар. Томшыгы юка, озын һәм аска таба карап тора. Канатлары киң һәм аркылыга чиратлашып килгән кара һәм ак полосалы.
Койрыгы кара, уртасында аркылы ак полосасы бар. Очышы дулкынсыман, канатлары белән еш кага. Җир өстендә еш кына бүреген селкетеп, тиз адымнар белән йөри. «Уп-уп» яки «худо-тут» дигән чакырулы тавыш чыга.
Кышка бу матур кошлар очып китә: кайсысы- Каспийның Көньяк ярларына, ә кайсысы ераграк та — Африкага, Һиндстанга, Көньяк Кытайга. Һөдһөдләр киң яфраклы урманнарда, яктыртылган яфраклы урманнарда, Россиянең Европа өлешендә бөтен көньяктагы урманлы чокырларда яши. Ояларын җир куышларында һәм агач куышларында ясый.