Татарстан Республикасы Биологик ресурслар буенча дәүләт комитеты автотранспортта барганда саклык чараларын үтәүне сорый
Татарстанда кыргый хайваннар белән юл-транспорт һәлакәте очраклары ешайды. 2021 елда 70 очрак теркәлгән. Аварияләр нәтиҗәсендә поши, кыр кәҗәләре һәм кабаннар һәлак була. Иң күп инцидентлар Әлмәт, Чистай, Алабуга, Питрәч, Алексеевск һәм Тукай районнарында булган.
Татарстан Республикасы Биоресурслар буенча дәүләт комитеты автомобильчеләрне тизлек режимын үтәргә, аеруча сак һәм игътибарлы булырга, кыргый җәнлекләр юлга чыгу ихтималы булган урыннар турында мәгълүмат бирүче билгеләрне игътибарсыз калдырмаска һәм тәүлекнең якты вакытында йөрергә тырышырга өнди.
Тыюлыклар, заказниклар янында яки хайваннар юлга чыга ала торган урман яннарында «Кыргый хайваннар» дигән юл билгесе куела. Бәрелеш булмасын өчен, участокта тизлекне киметергә кирәк.
Татарстан Республикасы Биоресурслар буенча дәүләт комитеты искә төшерә: автомагистральләрне төзегәндә һәм алардан файдаланганда кыргый хайваннарны саклау буенча чараларны күрергә кирәк. Бу, барыннан да элек, хайваннарны куркынычсыз миграцияләү өчен киртәләр һәм кичүләр урнаштыру. Ел саен юл-транспорт һәлакәтләре күп булган урыннарда «Кыргый хайваннар» дигән юл билгеләре куела.
Бу юнәлештә ведомство тарафыннан проект оешмалары белән уртак эш алып барыла. Проект төзү стадиясендә махсус үтү урыннары булган киртәләү җайланмаларын урнаштыру күздә тотыла. М-12 яңа трассасын проектлаганда мондый киртәләр һәм күчеш каралган. Ә Казан-Шәмәрдән юлының реконструкцияләнә торган участогында хайваннарның юлга чыгуына юл куймаучы махсус койма төзеләчәк.