Чистай активистлары туган якның табигый төрлелеге белән таныштылар
ТР Биоресурслар буенча дәүләт комитеты белгечләре «Чиста болыннар» табигать тыюлыгы буйлап экскурсия оештырды. Чарада шәһәр активистлары катнашты.
Экскурсия барышында алар тыюлыкның матур табигате белән таныштылар һәм анда яшәүчеләр һәм Кызыл китапка кертелгән хайваннар турында бик күп яңалыклар белделәр.
Шунысын да билгеләп үтәргә кирәк, тыюлык флорасында 320 гә якын үсемлек төре бар. Флористик составның нигезен урман һәм болын үсемлекләре тәшкил итә.
Үзән янындагы ур буенда каен һәм усак катнашмасы кергән нарат урманнары, ә утрауларда каен һәм усак катнашмасы кергән имәнлекләр сакланган.
Утрауларның болын төрлелеге 200 төргә якын үсемлектән тора. 70 төре дару үләннәре төркеменә карый, аларның 15се күп санлы: ике йортлы кычыткан, дару су кынасы, зур бака яфрагы, гади әрем һәм башкалар. 19 төр ТР Кызыл китабына кертелгән: дару авраны, дару песи борчагы, үпкә гентианасы, тау акбашы, дару курай үләне, Себер кылыч уты, татар канариясе, ачы казаяк, эре бака яфрагы, рус кырыкбуыны һ. б..
Үзән янындагы ур буенда һәм утрауларның литораль зоналарында су һәм су яны үсемлекләре үсә, аның флористик төрлелеге 20 төргә җитә. Алар арасында ТР Кызыл китабына кертелгән ап-ак төнбоек, сары төнбоек, очлы яфраклы һәм тупыйк яфраклы су кәбестәсе бар.
Шәһәр активистлары буа бакасы, гади тузбаш белән таныша алдылар. Сирәк очрый торган кызыл корсаклы су “үгезе”, гади кара елан, бакыр кәлтә, елга каракошы, ысылдык аккош, саз ябалагы, соры торна ТР Кызыл китабына кертелгән.
Тыюлык территориясендә аучылык кәсебе хайваннарыннан 12 төр яши. Күпсанлыларга су күсесе, соры куян, төлке, америка чәшкесе керә. Ак куян да гадәти. Кыр кәҗәсе, сусар, дала көзәне, ас, янутсыман эт, бурсык, кондыз сирәк очрый. Беренче дүрт төр Татарстан Республикасының Кызыл китабына кертелгән.
Ә вак имезүчеләр арасында-җирән һәм гади кыр тычканы, шулай ук урман тычканы.
Экскурсия бик мавыктыргыч һәм кызыклы булды.