Куйбышев сусаклагычын 6 меңгә якын чөгә балыгының маймычы белән тулыландырдылар
Бүген Лаеш районының Иске пристань авылында 5813 чөгә балыгының маймычы Куйбышев сусаклагычына чыгарылды. Балыкны чыгару биологик су ресурсларына китерелгән зыянны каплау өчен башкарылды.
Чара Россия балыкчылыгының Урта Идел территориаль идарәсенең Татарстан Республикасы буенча дәүләт контроле, күзәтчелек һәм су биологик ресурсларын саклау бүлеге тарафыннан ТР Биоресурслар буенча дәүләт комитеты һәм ТР Экология һәм табигый ресурслар министрлыгы катнашында оештырылды.
Исегезгә төшерәбез, гамәлдәге Россия Федерациясе законнары нигезендә, сулыклардагы барлык милек рәвешләрендәге предприятиеләр тарафыннан хуҗалык эшчәнлеген башкарганда, су биологик ресурсларына, аларның яшәү тирәлегенә һәм үрчетү шартларына тискәре йогынтыны максималь булдырмау чаралары каралырга тиеш.
Комиссиянең бурычы-эш барышын, аерым алганда, билгеләнгән таләпләргә туры китереп, маймычларны төяүне, күчерүне, табигый яшәү тирәлегенә чыгаруны контрольдә тоту.