Балаларга табигать турында:Спас районының балалар бакчасында тәрбияләнүчеләргә кышлаучы кошлар өчен җимлекләр ясау кагыйдәләре турында сөйләделәр

2021 елның 26 ноябре, җомга

Татарстан Республикасы Биоресурслар буенча дәүләт комитеты тарафыннан табигать дөньясына сак карашны үстерү буенча актив эш алып барыла. Әлеге эш кысаларында ведомство белгечләре тарафыннан балалар бакчаларында тәрбияләнүчеләр һәм мәктәп укучылары арасында  төрле чаралар оештырыла.

Шуларның берсе Спас районының «Төремкәй» балалар бакчасында тәрбияләнүчеләр өчен узды. «Спас» тыюлыгы хезмәткәрләре балаларга кышлаучы кошлар, алар артыннан дөрес карау һәм җимлекләр ясау кагыйдәләре турында сөйләделәр.

Чара барышында балалар викторинада катнаштылар һәм үз куллары белән җимлекләр ясадылар. Чара ахырында «Мин һәм Кызыл китап» дигән республика конкурсында җиңүчеләрне бүләкләү тантанасы узды.