«Балык- булсын!»: Әгерҗе районы укучылары балыкны һава җитмәгәнгә күрә үлүдән коткардылар
Ел саен салкыннар башлану белән боз кечкенә ермакларны һәм күлләрне каплый. Бу сулыкларда яшәүчеләр кислород ачлыгы кичерә-балык та, үсемлекләр дә һәлак булырга мөмкин. Бу вакытта ТР Биоресурслар буенча дәүләт комитеты хезмәткәрләре, тере организмнарның күпләп үлүенә юл куймас өчен, кулдан килгәннең барысын да эшлиләр.
Бу юлы «Балык- булсын!» акциясе Әгерҗе районының Ык елгасы табигать һәйкәле территориясендә узды. Чарада Кичкетаң урта мәктәбе волонтерлары һәм укучылары катнашты.
Балалар бу чарада бик теләп катнаштылар. Кемдер коры камыш җыйды, ә кемдер бәке бораулады.
«Эш җиңел түгел, әмма укучылар аны уңышлы гына башкарып чыктылар. Уртак көч белән без бозда ике йөзләп бәке тиштек», - дип билгеләп үтте «Кичкетаң» дәүләт табигать тыюлыгы башлыгы Руслан Маннапов.
Исегезгә төшерәбез, һава җитмәүлектән балыкның үлүенә каршы чаралар боз кату тәмамланганчыга кадәр дәвам итәчәк. Кислород җитмәүдән балыкның үлүен булдырмау эшенә һәркем үз өлешен кертә ала.