Балаларга табигать турында: Арча районы укучылары кышлаучы кошларга булыштылар
Арча районында Татарстан Республикасы Арча муниципаль районының «Арча 3 нче башлангыч гомуми белем мәктәбе -балалар бакчасы» укучылары арасында җимлекләр конкурсына йомгак ясалды. Чара «Кышын кошларны ашатыгыз!» дигән Бөтенроссия экологик акция кысаларында узды. Укучылар әти-әниләре белән төрле җимлекләр ясадылар.
Чара барышында «Ашыт» тыюлыгы хезмәткәрләре балаларга туган якның кышлаучы кошлары, аларның гадәтләре, үзләрен тотышы, нәрсә ашарга яратулары, шулай ук табигатьтә һәм кеше тормышындагы роле турында сөйләделәр.
«Өлкәннәрнең үсеп килүче буынга кышын кошларга ничек булышырга кирәклеге турында үрнәк күрсәтүләре шатландыра. Фантазиянең чиге юк. Агачтан, ташландык һәм табигый материаллардан җимлекләр күрергә мөмкин», - дип кичерешләре белән уртаклаша «Ашыт» тыюлыгы хезмәткәре Гөлнара Абдрахманова.
Чара ахырында балалар өлкәннәр белән бергә мәктәп яны территориясендә җимлекләрне элделәр.