Татарстанда Куйбышев сусаклагычы култыкларындагы су биоресурсларына мониторинг үткәрәләр
«Спас» дәүләт табигать тыюлыгы хезмәткәрләре Куйбышев сусаклагычы култыкларында су биологик ресурсларына һәм аларның яшәү тирәлегенә мониторинг уздырдылар.
Чарада шулай ук «Главрыбвод» Федераль дәүләт бюджет учреждениесенең баш ихтиологы Рөстәм Сафиуллин катнашты.
Тикшеренүләр боз асты видеокамерасы ярдәмендә үткәрелде.
«Мондый заманча күзәтү җайланмаларыннан файдалану проблемалы участокларны ачыклауга ярдәм итә, бу локаль урыннарда кислород ачлыгыннан балыкларның үлүен булдырмау буенча үз вакытында чаралар күрергә мөмкинлек бирәчәк», - дип сөйләде «Спас» дәүләт табигать тыюлыгы башлыгы Евгений Костин.
Әлеге чаралар кысаларында белгечләр акваториянең тикшерелгән участокларында су асты яшәүчеләренең канәгатьләнерлек хәлдә һәм актив булулары турында билгеләп үттеләр. Әлеге чаралар дәвам итәчәк.