Татарстанда сулыкларны браконьерлык коралларыннан чистарту буенча эш дәвам итә

2022 елның 16 марты, чәршәмбе

ТР Биоресурслар буенча дәүләт комитеты сулыклардан браконьерлык ятьмәләрен чыгару буенча эшен дәвам итә.

Шулай итеп, ТР Биоресурслар буенча дәүләт комитеты хезмәткәрләре җәмәгатьчеләр белән берлектә уздырылган чираттагы рейд барышында, Мамадыш районында Кама елгасында законсыз урнаштырылган 16 браконьерлык ятьмәсе табылды һәм тартып чыгарылды.

2021 елда республика сулыкларыннан 7336 тоту коралы алынган. Су биологик ресурсларына китерелми калган зыян суммасы 146,2 млн. сум дип бәяләнә. Бу-браконьерлыктан сакланган 140 тоннадан артык елга балыгы. Рейд чаралары бөтен республика территориясендә даими рәвештә үткәрелә.