ТР Биоресурслар буенча дәүләт комитетының Хайваннар дөньясын саклау өлкәсендә инновацион технологияләр кертү үзәге хезмәткәрләре затлы боланнар өчен кышкы туклану «аланнары» оештырдылар
Кышын «Мишә» һәм «Урман чишмәсе» аучылык тыюлыкларында планлы эштән тыш күңелле мәшәкатьләр дә өстәлә.
Татарстан Республикасының Биоресурслар буенча дәүләт комитетының Хайваннар дөньясын саклау өлкәсендә инновацион технологияләр кертү үзәге хезмәткәрләре көн саен маралларны тукландыру мәйданчыкларында азыкны тулыландыралар.
Анда печән, ашлык һәм тоз калдыралар. Азыкны көн саен яки көн аралаш өстиләр. Витаминнар, ничек кенә дисәң дә, хәзер һәркайсына кирәк. Йомшак мөгезләрнең сыйфаты шуңа бәйле. Әйтик, мараллар бер ай эчендә бер тонна тоз һәм башка минераллар ашыйлар.
Мараллар утлыкларга ияләшәләр һәм, гадәттә, бөтен көтүләре белән киләләр. Һәр төркем билгеле бер утлыкны үз итә, аңа читләрне кертми. Көтү ашаганда, көтү башлыгы аларны саклый, ахырда ул үзе ашый башлый, ә калганнары читкә китә һәм аның туенганын көтә.