Ау мылтыклары сугышчыларның гомерләрен саклап калган
Татарстан аучылары һәм ТР Биоресурслар буенча дәүләт комитеты хезмәткәрләре тапшырган мылтыклар үзләрен эштә исбатлаган. Алар ике дронны бәреп төшерергә һәм махсус хәрби операция зонасында сугышчыларның гомерләрен саклап калырга ярдәм иткән.
Ау мылтыклары дроннар белән көрәштә иң нәтиҗәле чара, чөнки аларның атканда зарарлау мәйданы зуррак. Аларның радиусы дошманга мөмкинлекләр калдырмый. Моннан тыш, алар эңгер-меңгердә бик нык ярдәм итәләр. Атканда дрон ягына оча торган ядрә болыты барлыкка килә. Бер ядрә аны очып барганда бәреп төшерә. Шуңа күрә «шома көпшәләр» фронтта алыштыргысыз.
Алгы сызыктагы сугышчылар махсус хәрби операция зонасына җибәрү өчен лицензия-рөхсәт бирү үзәкләренә мылтыкларын тапшырырга килүчеләрнең барысына да рәхмәтле. Бу бит алар көткән иң кирәкле ярдәм.