Чижик өенә кайтты: ТР Биоресурслар буенча дәүләт комитеты хезмәткәрләре кара керәшә баласын коткарып калды һәм табигый яшәү тирәлегенә чыгарды.
Июль башында Буа районында гаҗәеп рәвештә кошчыкны коткаралар. Торак йорттан ерак түгел ТР Биоресурслар буенча дәүләт комитеты хезмәткәрләре чирәмдә кара керәшә баласын табалар. Берничә көн дәвамында алар кошчыкны күзәтәләр, ләкин, ни кызганыч, ата-аналары күренми.
Кошчыкны бәладә калдырырга теләмичә, хезмәткәрләр аны үз тәрбияләренә ала. Кошчыкны тәрбияләү аеруча игътибар таләп итә: аны бөҗәкләр белән туендыралар һәм пипеткадан су эчерәләр. Тора-бара кош баласы ныгый, «Чижик» дигән ягымлы кушамат та ала.
Бер ай эчендә коткаручылар күзәтүе астында кош баласы актив һәм сәламәт керәшәгә әверелә. Ул бик рәхәтләнеп тәрбиячеләренең кулларына сикереп менә һәм көн саен түземсезлек белән ашату вакытын көтә. Кошчык, тулысынча ныгып, мөстәкыйль тормышка әзер булгач, аны табигый яшәү тирәлегенә чыгаралар.