Саз карчыгасын коткару: Чистайдан бер гаилә яраланган саз карчыгасына булышкан
Чистай районыннан бер гаилә кырда яраланган саз карчыгасын күреп ала. Битараф булмаган кешеләр ерткыч кошны кичекмәстән ТР Биоресурслар буенча дәүләт комитеты белгечләренә тапшыралар. Кошны тикшергәндә, белгечләр аның канаты сынуын ачыклый. Хәзер карчыгалар гаиләсе вәкиле булган саз карчыгасы Яшел Үзән районында Сирәк очрый торган хайван төрләрен коткару, яшәтү һәм табигый яшәү тирәлегенә кайтару станциясенең дәвалау корпусы белгечләре күзәтүе астында.
Саз карчыгасы – шактый киң таралган ерткыч, аны үзенчәлекле силуэты буенча җиңел танып була. Аның тышкы кыяфәтенең төп үзенчәлеге –озын тар канатлары, гәрчә кайчакта аларның формасы аерылып торырга мөмкин булса да. Шунысы кызык, исемнәренә карамастан, бу кошлар сазлыкларда гына тереклек итми. Алар камыш, җикәнбаш һәм башка куе үсемлекләр үскән теләсә кайсы сулык янында оя корырга яраталар. Саз карчыгалары исә ачык киңлекләрдә –кырларда һәм болыннарда аулыйлар.