Машканың тарихы: кеше кайгыртуы поши бозавына үсәргә ярдәм итте
Хайваннар дөньясын саклау өлкәсендә инновацион технологияләр кертү үзәге хезмәткәрләре май башында коткарылган поши бозавы тормышындагы уңышлар белән уртаклашалар. Башта җиңел булмый: ул бөтенләй кечкенә һәм зәгыйфь була. Белгечләр көн саен кул асларындагы нәнинең сәламәтлеген күзәтеп торалар, асылда аны әнисе урынына тәрбияләр. Күз уңыннан бер дә ычкындырмыйлар һәм беренче көннәрдән башлап көненә берничә тапкыр имчәкле шешәдән сөт ашаталар. Хезмәткәрләр аңа шулкадәр ияләшәләр ки, аңа Машка кушаматы тагалар.
Башта Машка бик аз йөри, гел ашарга сорап тора. Ләкин тиздән ул үзен яхшырак хис итә, шартларга җайлаша һәм, хезмәткәрләрне шатландырып, йөгерә дә башлый. Хәзер алты айлык пошиның авырлыгы да сизелерлек арта, ул территориядә рәхәтләнеп йөри һәм, бик тәмләп, үсемлек азыгын да ашый.
Зур булуына карамастан, Машка һаман да бала булып кала, шуңа күрә аның шаянлыгы үз яшенә туры килә. Аны табигый мохиткә киләсе елда чыгарырга планлаштыралар. Исегезгә төшерәбез: бу май бәйрәмнәрендә булган хәл. Батып баручы өч-биш көнлек поши бозавын Зеленодольск районының Бритвино авылы янындагы сазлыктан кул астындагы чаралар ярдәмендә коткаралар.‑ Әнисе дә янәшәдә була, ләкин баласына берничек тә ярдәм итә алмый. Шул вакыттан бирле поши бозавы Үзәк хезмәткәрләре тәрбиясендә һәм даими күзәтүендә яши.