Кыш кичеккәндә: ТР Биоресурслар буенча дәүләт комитеты хезмәткәрләре хайваннарга һәм кошларга аномаль кышны кичерергә ничек ярдәм итә
Календарь кыш җитү белән хайваннар һәм кошларның салкынга ничек әзерләнүләре һәм биотөрлелекне саклау өчен нәрсәләр эшләнүе турында сөйлибез. ТР Биоресурслар буенча дәүләт комитеты хезмәткәрләре гомуми кулланылыштагы аучылык биләмәләренә һәм аеруча сакланулы табигать территорияләренә экологик сукмаклар әзерлиләр, җимлекләр элеп куялар, тозлыклар куялар һәм азык салалар. Әмма кар булмау – күп төрләр өчен җитди сынаулар тудыра.
Кыш көне кар капламы булмау куяннарга бигрәк тә авыр була: йоннарының ак төсе (ул аларга карлы чорда маскировка булып хезмәт итә) карсыз көннәрдә аларны ерткычларга бик нык сиздереп тора. Моннан тыш, кар булмау аларны табигый ышык урыннарыннан мәхрүм итә – куяннар, гадәттә, көрт эчләрендә сыену урыны булдыралар, ә карсыз аларның ерткычлардан да, салкыннан да сакланыр мөмкинлекләре юк. Һәрбер җәнлек кышка үзенчә‑ әзерләнә: керпеләр запас җыялар һәм йокыга талалар, тиеннәр чикләвекләр яшерәләр һәм куышларын җылыталар, аюлар, май туплап, өннәрендә кышлыйлар, бурсыклар һәм байбаклар да май туплыйлар һәм ояларында йоклыйлар, кондызлар буаларны ныгыталар һәм үзагач әзерлиләр, ә ондатралар су үсемлекләренә елышалар.