Табигатьнең уяну сезоны игелекле эшләрдән башланды: ТР Биоресурслар буенча дәүләт комитеты хезмәткәрләре һәм «Беренчеләр хәрәкәте» вәкилләре язны табигатьне кайгырту белән каршы алдылар.

2026 елның 2 марты, дүшәмбе

ТР Биоресурслар буенча дәүләт комитеты хезмәткәрләре, Куйбышев аучылык хуҗалыгы белгечләре һәм «Беренчеләр хәрәкәте» вәкилләре вакытларын файдалы итеп саф һавада уздырдылар. Укучылар җирле кыргый хайваннарга катлаулы һава шартларын кичерергә ярдәм итү максатыннан бер көнгә үзләрен белгечләр итеп хис итә алдылар. Алар, өлкәннәр белән беррәттән, тукландыру мәйданчыкларына печән, ашлык һәм тоз тараттылар, булган утлык-җимлекләрне кардан чистарттылар.

«Һәр кешенең бурычы – үз Ватаны, шул исәптән аның табигый байлыклары турында кайгырту. Минем яшьтәшләремнең күбесе күп вакытларын виртуаль дөньяда үткәрәләр һәм тәрәзә артында ниләр барганын хәтта сизмиләр дә. Без, «Беренчеләр хәрәкәте» вәкилләре буларак, табигать белән танышырга, яңа һәм өйрәнелмәгәнне өйрәнергә кирәк дип саныйбыз. Моның өчен дөньяның икенче ягына очу мәҗбүри түгел – безне туган якларыбызда да бик күп кызыклы ачышлар көтә. Хәрәкәт һәм мондый акцияләр нәтиҗәсендә без үзебезне тикшеренүчеләр һәм галимнәр итеп тоя алабыз, шулай ук туган җиребезне яхшырак өйрәнә алабыз», – дип тәэсирләре белән уртаклаштылар «Беренчеләр хәрәкәте» вәкилләре. Үсеп килүче буынны экологик агартуга җәлеп итү һәм аларның мондый чараларда катнашуы 2024 елда тәмамланган «Экология» милли проектының дәвамы булган «Экологик иминлек» милли проектының максатларын һәм бурычларын тормышка ашыруга ярдәм итә.