Виртуаль маҗара: интернат‑мәктәп укучылары Спас районының флорасын һәм фаунасын өйрәнделәр
Бу атнада билгеләп үтелгән Халыкара кыргый табигать көне уңаеннан «Спас» тыюлыгы белгечләре Болгар шифаханә интернат мәктәбенең башлангыч һәм урта сыйныф укучылары өчен танып белү чарасы оештырды.
Балалар район киңлекләре буйлап мавыктыргыч виртуаль сәяхәт ясадылар: аның уникаль флорасы һәм фаунасы белән таныштылар, бу территориядә үсүче үсемлек һәм андагы хайваннарның сирәк төрләре турында белделәр. Кыргый табигатьтә яшәүчеләрне аларның табигый тирәлегендә күрергә мөмкинлек бирә торган төсле фото‑ һәм видеоматериаллар аеруча тәэсир калдырды. Чара хайваннар турында интерактив викторина белән тәмамланды. Укучылар үзләренең белемнәрен күрсәтеп һәм кыргый табигать дөньясы турында кызыклы яңа фактлар белеп, сорауларга бик теләп җавап бирделәр.Үсеп килүче буынны экологик агартуга җәлеп итү һәм аларның мондый чараларда катнашуы 2024 елда тәмамланган «Экология» милли проектының дәвамы булган «Экологик иминлек» милли проектының максатларын һәм бурычларын тормышка ашыруга ярдәм итә.