Арча районында егерьгә һөҗүм ясалган

2021 елның 11 августы, чәршәмбе

Бу хәл 9 августта булган. Кич белән, Арча районындагы аучылык хуҗалыкларының берсендә рейд уздырган вакытта, егерьларның берсе  шикле УАЗ машинасы күреп алган.

Егерь әлеге машинаның эзләрен тикшергән. Тикшерү барышында ул 2 ау мылтыгын табып алган һәм бу хакта кичекмәстән полициягә хәбәр иткән.

Полиция хезмәткәрләрен көткәндә, егерьның шәхси йортына билгесез затлар бәреп кергән.

Җинаятьчеләр аучыны җәрәхәтләгән, алынган коралны  үзләренә кире алган һәм вакыйга урыныннан качкан.

Кайнар эзләр буенча полиция хезмәткәрләре һөҗүм итүчеләрне тоткарлап, коралларын тартып алган. Хәзерге вакытта җинаять эше кузгату мәсьәләсе хәл ителә.