“Кичке таң” тыюлыгы территориясендә ысылдык – аккош төркеме күренде

2022 елның 5 апреле, сишәмбе

“Кичке таң” дәүләт табигать тыюлыгы территориясенә ысылдык-аккошлар очып килде. Кошларны тыюлык башлыгы Руслан Маннапов күреп алды.

“Территорияне карап йөргәндә өч ысылдык-аккош күрдем. Алар ачык һәм сай суны яраталар. Шуңа күрә алар безгә килделәр дә”, - диде ул.

Татарстан Республикасы Биоресурслар буенча дәүләт комитеты ысылдык-аккошның утрак тормыш алып баручы үрдәклеләр гаиләсе вәкиле булуын искә төшерә. Казсыманнар отряды арасыннан иң зурысы. Соңгы елларда аларны республиканың, һава-су үсемлекләре үсә торган эре сулыклары булган, барлык районнарында да күрәләр. Алар Татарстан Республикасының Кызыл китабына кертелгән.