Табигатькә ярдәм иттеләр: Түбән Кама районы укучылары 150 метр уылдык чәчү урыны урнаштырдылар һәм Каракүл яр буен җыештырдылар
Түбән Кама халкы һәм кунаклары елга һәм сулыклар ярында ял итәргә ярата. Тик һәркем дә, ял иткәннән соң, үз артларыннан җыештырмый.
Ә ял итү урыннары чистарак булсын өчен, ТР Биоресурслар буенча дәүләт комитетының районара бүлеге хезмәткәрләре Балалар экология-биология үзәге һәм Красноключинск урта гомуми белем бирү мәктәбе тәрбияләнүчеләре белән бергә Каракүл яр буен чистарттылар.
«Мондый чараларны без ел саен үткәрәбез. Без гражданнарыбызның үзләреннән соң чүп-чар калдырмаска кирәклеге турында фикерләрен үзгәртмичә торып, тиешле нәтиҗәгә ирешә алмаячакбыз. Ә кеше җыештыруларда үзе катнашса, әйләнә-тирә мохитнең пычрануы нәрсәгә китерүен аңлый башлый», – ди бүлек башлыгы Эдуард Иванов.
Чара ахырында мәктәп укучылары, балык үрчетү өчен уңай шартлар тудыру һәм су биологик ресурсларының кыйммәтле төрләрен арттыру һәм саклау өчен, ылыс ботакларыннан 150 м ясалма уылдык чәчү урыны ясадылар һәм урнаштырдылар.