Дуслык һәм спорт берләштерә! Чистайның 10 гаиләсе беренче туристик слетта катнашты
«Камалия» ял итү-үстерү үзәге хезмәткәрләре «Чиста болыннар» тыюлыгы белән берлектә Чистай районында Гаилә елына багышланган беренче ике көнлек гаилә туристик слетын үткәрделәр. Беренче көнне гаиләләр бау курсы буенча ярыштылар, шулай ук чүлмәкче түгәрәгендә һәм балавыздан шәм ясау буенча мастер-классларда катнаштылар. Икенче көн – экскурсияләр көне була. Катнашучылар катамараннарда «Чиста болыннар» тыюлыгы экосукмагы буйлап йөзделәр һәм анда яшәүче аккойрык бөркет, ак челән, баклан һ. б. белән таныштылар.
«Гаилә туризмы – аралашуның һәм уртак эшчәнлек алып баруның менә дигән формасы, ул гаиләне ныгытуга ярдәм итә һәм балаларны һәм өлкәннәрне туристлык эшчәнлегенә җәлеп итү өчен шартлар тудыра. Барлык катнашучыларга бергә вакыт уздыру өчен беренче турслетка җыелганнары өчен рәхмәт белдерәбез», – дип билгеләп үтә «Чиста болыннар» тыюлыгы башлыгы Максим Улыбин.
Чара барышында катнашучылар бик күп уңай хис-кичерешләр алды. Оештыручылар, актив тормыш рәвеше һәм гаилә ялы белән кызыксынуны дәвам итү өчен, мондый чараларны киләчәктә дә үткәрергә планлаштыралар.
«Бу вакытны гаилә белән бергә уздыру, үзеңне ярыш дисциплиналарында сынап карау һәм саф һавада актив ял итүдән ләззәт алу өчен менә дигән ысул иде. Без команда белән эшләргә өйрәндек», – дип тәэсирләре белән уртаклаштылар катнашучылар.