Әлмәт районында Акташ Упкыны күле территориясен төзекләндерделәр
Акташ Упкыны күле – уникаль табигать һәйкәле, ул Әлмәт районында яшәүчеләрнең генә түгел, ә күпсанлы сәяхәтчеләрнең дә игътибарын җәлеп итә. Кызганыч, халык табигатьне сакламый һәм еш кына үзләреннән соң чүп-чар калдыра. Су объектын тәртипкә китерергә Кәләй авыл җирлеге җитәкчеләре, туган якны өйрәнүчеләр, геологлар, шулай ук Әлмәт шәһәренең М.К. Таһиров исемендәге 1 номерлы лицей укучылары, В.Д. Шашин исемендәге «Татнефть» ГАҖнең геофизиклары булышты.
«Бу карст күле – республикада иң тирән күл. Сулык тирәнлеге 20 метр булган бүрәнкә төбендә урнашкан. Ул узган гасырның 30 нчы елларында, карст куышлыгына җир убылып төшеп барлыкка килгән», – ди тыюлык башлыгы Фәрит Динмөхәммәтов.
Уртак көч белән алар табигать һәйкәле территориясен чүп-чардан чистарттылар, аншлаглар куйдылар, койманы буядылар һәм агачлар утырттылар. Яшь агачлар тыюлык хезмәткәрләре күзәтүе астында үсәчәк.
Утыртылган агачларга һәм табигать һәйкәленә халык сак карар дип өметләнәбез.