“Балтач” дәүләт табигать тыюлыгына - 21 яшь
Төбәк әһәмиятендәге “Балтач” дәүләт табигый тыюлыгы 2001 елның 11 апрелендә оештырылды. Ул Нократ елгасы бассейнының уң як яр буе өлешендә урнашкан. Биредә Татарстанның тамгасы 188 м булган иң төньяк пункты урнашкан.
Казансу һәм Шошма елгалары арасындагы биек сулыкларда исәпләнгәндә, ылыслы агачлар су саклау әһәмиятенә ия була. Кайбер урман массивлары флорасының төр төрлелеге төбәкнең төп кара ылыслы-киң яфраклы урманнарының үзенчәлеген шактый тулы чагылдыра.
Беренче тапкыр территорияне флористик тасвирлау Казан император университеты профессоры Порфирий Крылов тарафыннан 1885 елда башкарылган. Узган гасырда имән утыртмалары катнашмасында монда үсемлекләрнең күп кенә төрләре ачыкланган. Мәсәлән,чуклы шалфей, кияү камчысы, сары умырзая, мәче борчаклары һ. б.
Тыюлык территориясендә ТР Кызыл китабына кертелгән үсемлек һәм хайваннарның 30дан артык төре үсә һәм яши.
Тыюлыкның беренче участогында 44 төрле кош яши, шул исәптән ТР Кызыл китабына кертелгәннәр. Алар арасында дала лачысы, эрбет чыпчыгы, бөркет, каберлек бөркете, кыйгыр, зур чуаркош, зур шөлди, ак маңгайлы һәм соры каз, байгыш, урал мәче башлы ябалагы, чыпчык һәм йөнтәч аяклы чырайсыз ябалак, карчыга һәм ак ябалак. Икенчесендә - 66 төр кош.
Моннан тыш, территориядә җир-су хайваннарының 8 төре һәм сөйрәлүчеләрнең 5 төре яши. Еш кына соры һәм яшел, күл, буа, үлән һәм очлы башлы бакалары, кызыл корсаклы “ су үгезе” һәм гади тритон, гади кара елан, бакыр елан, гади тузбаш, җитез кәлтә һәм тереләй тудыручы кәлтәләр очрый.
Тыюлык территориясе дала җирләренең генофондын һәм биотөрлелеген саклауда, шулай ук фәнни-тикшеренү һәм экологик белем бирү эшчәнлегендә искиткеч кыйммәткә ия.