ТР Биоресурслар буенча дәүләт комитеты табигатьтә янгын куркынычсызлыгы кагыйдәләрен үтәү зарурилыгы турында искә төшерә

2022 елның 24 августы, чәршәмбе

Республика территориясендә урманнарның югары һәм гадәттән тыш янгын куркынычы саклануга бәйле рәвештә һәм ТР Министрлар Кабинетының «Урманнарда гражданнарның булуын һәм анда транспорт чаралары кертүне чикләү турында» карары нигезендә, ТР Биоресурслар буенча дәүләт комитеты аеруча саклана торган табигать территорияләрендә янгын куркынычсызлыгы кагыйдәләрен үтәргә чакыра.

Әлеге территорияләр режимнарында каралган чикләүләрнең берсе – табигый үсемлекләрне яндыруны, учак ягуны тыю.

Моннан тыш, урманнарда түбәндәгеләр тыела:

• җитештерү һәм куллану калдыклары белән урманнарны чүпләү;
• ау вакытында янучан яки пыскучан материаллардан пыж куллану;
• яшь ылыслы үсентеләр утыртылган, янгыннан калган урыннарда, зарарланган урман кишәрлекләрендә, торфлыкларда, агач калдыкларыннан (урман диләнкеләрендә агачларны екканда һәм төяү урынына ташыганда, шулай ук кәүсәләрне ботаклардан арындырганда барлыкка килгән агач калдыклары – киселгән агачларның өске өлешләре, ботаклар, чыбык-чабыклар) чистартылмаган агач кискән урыннарында, утын әзерләнгән җирдә, кипкән үләнле җирләрдә, шулай ук агач ябалдашлары астында ачык ут (учаклар, паять итү лампалары, примуслар, мангаллар, тимер учаклар) куллану. Башка урыннарда ачык утны куллану 0,5 метр киңлектәге янгынга каршы минераль полоса белән бүленгән мәйданчыкларда рөхсәт ителә. Агач кискән калдыкларны яндыру тәмамланганнан яисә аны башка максатларда файдаланганнан соң, туфрак белән яхшылап күмәргә яки, пыскуы тулысынча туктаганчы, су сибәргә;
• сүндерелмәгән шырпы, тәмәке төпчекләре һәм тарткыч трубкалардан кайнар көлне, пыялалар ташлау;
• майланган яисә бензин, керосин яки башка ягулык матдәләре белән туендырылган материалларны моның өчен махсус билгеләнмәгән урыннарда калдыру;
• двигатель эшләгәндә эчке янулы двигательләрнең ягулык бакларына ягулык салу, двигательнең туклану системасы төзек булмаган машиналарны куллану, шулай ук тәмәке тарту яки ягулык салына торган машиналар янында ачык уттан файдалану.

Ә республиканың Әгерҗе, Азнакай, Аксубай, Әлки, Әлмәт, Арча, Баулы, Биләр, Болгар, Бөгелмә, Буа, Алабуга, Зәй, Яшел Үзән, Ислейтар, Кайбыч, Кәләй, Кама, Кызыл Йолдыз, Лаеш, Лениногорск, Лубян, Мамадыш, Минзәлә, Түбән Кама, Түбән Кама, Нурлат, Идел буе, Шәһәр яны, Саба, Тәтеш һәм Чирмешән урманчылыклары чикләрендәге урман фондының барлык территориясендә гражданнарның урманнарда булуын, шулай ук, урманнардан файдалану буенча эшчәнлекне Россия Федерациясе законнары нигезендә гамәлгә ашыручы затларның гомуми файдаланудагы юлларыннан үтәли йөрүеннән тыш, аларга транспорт чаралары керү һәм урманнарда янгын куркынычсызлыгын тәэмин итү максатларында 30 августка кадәр кайбер төр эшләр башкаруга чикләү кертелде.

Урманда янгын ачыкланган очракта ашыгыч оператив хезмәтләрне бердәм чакыру номерына –01, 112 гә шалтыратырга кирәк.