Кошларның кошчыклары чыга: татарстанлылардан табигатьтә тавыш чыгармауларын сорыйлар

2023 елның 20 апреле, пәнҗешәмбе

Апрельдән июльгә кадәр кошларда үрчем-ояда утыру чоры була. Кошлар бала чыгара. Җылы яклардан кайткач, парлаша башлыйлар һәм бала чыгарырга әзерләнәләр.

Кошлар ояда утырганда, кеше аларның дошманына әйләнергә мөмкин. Урман аланында гадәти генә ял итү дә төзәтеп булмый торган нәтиҗәләргә китерергә мөмкин.

Шау-шулы күршеләре яшь кош гаиләсенә һәм яңа туган балаларына комачаулый. Артык борчылу кайвакыт кайбер төр кошларның оя корудан баш тартуына да сәбәп була. Кошлар бала чыгарырга утырганда яки ашатканда, шау-шу аркасында алар куркып, оядан очып китәргә һәм кире кайтмаска мөмкин.

Кош балаларының үлемендә гаепле булмас өчен, ТР Биоресурслар буенча дәүләт комитеты хезмәткәрләре түбәндәге кагыйдәләрне үтәүне сорыйлар:

• Урманга эчкәре кермичә, канатлы кошларны куркытмас өчен, сукмаклардан гына йөрергә тырышыгыз.
• Кайбер «табигать сөючеләр» кошны ояда фотога төшерергә омтылалар, әмма аңа зыян китергәннәрен аңламыйлар. Әгәр дә олы кош аны ташлап китсә, балалары салкыннан, кояшның турыдан-туры нурларыннан, атмосфера явым-төшемнәреннән һәм хәтта кан суыручы бөҗәкләрдән дә үләчәк.
• Әгәр дә Сез парк яки урман буйлап эт белән йөрисез икән, аны бәйдә йөртегез. Эт, кош оясын табып, аны тар-мар итәргә мөмкин.
• Әгәр дә сез оя күрсәгез – кызыксынуыгызны басыгыз, якын килмәгез. Сез сиздерми генә күзәтеп торучы ерткычларның игътибарын аңа җәлеп итәргә мөмкин. Мәсәлән, каргалар отряды вәкилләре йомырка гына түгел, ә вак кош балаларын да, ә акчарлаклар хәтта үрдәкләр кебек зурларны да ашарга мөмкин.
• Пикник урыннарын кошлар оя корган урыннарыннан читтәрәк сайлагыз.
• Әгәр дә якын-тирәдә борчылучы яки яраланган кошны күрсәгез, читкә китегез, ул, мөгаен, үз оясыннан игътибарны читкә юнәлтергә телидер.
• Әгәр дә Сез кош баласын күрсәгез, аңа булышырга яки өйгә алып кайтырга тырышмагыз. Ул, мөгаен, очарга гына өйрәнә, һәм әти-әнисе дә якын-тирәдә генәдер – алар үз балаларын ташламаячаклар.