Заказникта очрашу: Лениногорск районында Кызыл китапка кертелгән ябалак гаиләсен күргәннәр
Сазлык ябалаклары гаиләсен А.И. Щеповских исемендәге комплекслы профильле төбәк әһәмиятендәге дәүләт табигать заказнигы территориясендә күреп алалар. Аларны телефон һәм телескоп ярдәмендә төшерергә мөмкинлек була.
Кошларның бу сирәк очрый торган төре Татарстан Республикасының Кызыл китабына кертелгән. Республика территориясендә яшәүче ябалаклар күчмә кошлар санала. Апрельнең икенче яртысында кайталар, сентябрьдә китәләр. Алар, җиргә бик якын түбән очып, башлыча тычкан сыман кимерүчеләрне аулыйлар, кайвакыт һавада эленеп торырга мөмкиннәр. Башка туганнарыннан аермалы буларак, оя кору чорында үз ояларын төзиләр. Ул гадәттә җирдә үләннәр һәм нечкә ботаклардан торган өем астында кечкенә чокырда урнашкан була.
Соңгы ун елда әлеге төр республиканың күп районнарында билгеләнгән, ләкин бик сирәк һәм берәмләп кенә. Ябалаклар очраган төп урыннар республиканың төньяк яртысына һәм көнчыгышына туры килә: Әгерҗе, Азнакай, Арча, Биектау, Алабуга, Яшел Үзән, Лаеш, Лениногорск, Саба районнары.