Мәрхәмәтле йөрәк: Буа районы чаңгычысы урман кошларын тукландыра
Кышкы авыр чорда кошларга ярдәм итү, аларны күзәтү, аларның гадәтләрен һәм үзенчәлекләрен өйрәнү – Буа районының Бикмураз авылында яшәүче Илсур Гыйбадуллинга балачактан ук сеңдерелгән файдалы һәм кызыклы шөгыль.
Күп еллар дәвамында ул һәр кышта яраткан спорт төре белән шөгыльләнә, һава шартларына карамастан, эштән һәм өй эшләреннән буш вакытта урманда яшәүче яклаучысыз җан ияләрен тукландыра. Ул үзе белән тулы пакет кыздырылмаган көнбагыш ала һәм аларны чаңгы трассасында урнаштырылган барлык җимлекләргә тарата. Тиеннәр турында да онытмый.
«Һөнәрем буенча мин – агач остасы. Кошлар турында салкыннар башлангач ук кайгырта башлыйм һәм шулай язга кадәр. Үзебезнең йорт янында кошлар өчен йортлар ясап урнаштырам. Күп кенә күршеләр дә җимлек ясап бирергә сорыйлар, мин баш тартмыйм», – дип сөйли Илсур Гыйбадуллин.
Кошларга карата мәхәббәт һәм кайгыртуны ул үз балаларында да тәрбияләргә тырыша, аларны балачактан ук өйрәтә, һәм кошларны алар бергә ашаталар. Чөнки кече дусларыбызны кайгырту һәркемгә кагыла, ә игелекле эшләр башкару бик җиңел. Бары бер уч ашлык кына да дистәләгән кошны үлемнән коткара ала.