Хайваннар дөньясын саклау өлкәсендә инновацион технологияләр кертү үзәге хезмәткәрләре Кызыл китапка кертелгән аккойрык бөркетне үз тәрбиясенә алган
Казан клиникаларының берсендә мал табиблары Кызыл китапка кертелгән тәпие җәрәхәтләнгән аккойрык бөркетне коткара. Кош клиника территориясендә калдырыла, анда бер атнага якын дәвалану курсы уза. Бөркеткә махсуслаштырылган тәрбия таләп ителүе билгеле булгач, аны Хайваннар дөньясын саклау өлкәсендә инновацион технологияләр кертү үзәгенә тапшыралар. Үзәк хезмәткәрләре аны тикшерәләр һәм кошның аяклары хәрәкәтләнмәвен раслыйлар, ә тышкы җәрәхәтләр булмый. Үзәк белгечләре бөркетне Яшел Үзән районындагы сирәк төр хайваннарны коткару, тәрбияләп тору һәм табигый яшәү тирәлегенә кайтару станциясенең дәвалау корпусына урнаштыра.
.jpg)
Хәзерге вакытта кош үзәк хезмәткәрләре тарафыннан даими тикшереп торыла: алар тиешле тәрбияне тәэмин итәләр һәм бөркетнең хәлен күзәтәләр. Аларның тиешле дәрәҗәдә һөнәри эшчәнлеге нәтиҗәсендә Кызыл китапка кертелгән кошның тернәкләнү һәм кыргый табигатькә кайту мөмкинлеге барлыкка килә.