Татарстанның балык сәнәгатьчеләре Түбән Новгородта республикабызны уңышлы гына күрсәтеп кайттылар
Татарстанның Балык сәнәгатьчеләре ассоциациясе Россия халыклары кухняларына багышланган фестивальдә катнашты һәм үзенең продукциясен уңышлы гына күрсәтеп кайтты. Чара Түбән Новгородта Россия Федерациясе Президенты администрациясе инициативасы белән узды.
Балыкчылык буенча Федераль агентлыкның Урта Идел территориаль идарәсе җитәкчесе Вадим Ткачев бәйрәмне оештыруда һәм үткәрүдә актив катнашканы өчен рәхмәт хаты юллады: «Сезнең яктан бу чараны хуплавыгыз гына фестивальне якты һәм истә калырлык итәргә мөмкинлек бирде! Хезмәттәшлек өчен рәхмәт һәм киләчәктә дә иң кыю проектларны уртак тормышка ашыруга өметләнәбез», - диелә хатта.
Фестиваль кысаларында мастер-класслар һәм балык дегустацияләре узды. Татарстан Республикасыннан Лаеш, Мамадыш Балык заводлары һәм шәхси эшмәкәр Анатолий Подгорнов катнашты. Алар үзләре җитештергән продукция: төрле төрдәге какланган һәм ысланган балык, кыздырылган судак филесы, кунаклар игътибарын җәлеп иткән чуртан кәтлитләре белән таныштырдылар, кабып карарга мөмкинлек бирделәр. Фестивальнең төп ризыгы булып балык ашы булды.