Лениногорск районының Кызыл китапка кертелгән байлыгына – 22 яшь
Быел А.И. Щеповских исемендәге «Дала» комплекслы профильле төбәк әһәмиятендәге дәүләт табигый тыюлыгы үзенең 22 нче туган көнен билгеләп үтә. Бу аеруча саклана торган уникаль табигый территория ТРның Кызыл китабына кертелгән 40 тан артык үсемлек һәм хайван төре булган флора һәм фауна элементларын сакларга, төбәктәге экологик хәлне яхшыртырга мөмкинлек бирде. Тыюлыкны төзү турында карар 2000 елның 26 октябрендә Татарстан Республикасы Министрлар Кабинеты карары белән кабул ителде.
14 елдан соң аңа республиканың әйләнә-тирә мохитне саклау буенча дәүләт идарәсе системасына нигез салучыларның берсе Анатолий Иванович Щеповских исеме бирелде.
Тыюлык территориясе гомуми мәйданы 5830,28 гектар булган 31 дала һәм урман-дала участогыннан тора.
Пейзажының матурлыгы, уникаль флора һәм фаунасының күптөрлелеге аны карарга теләүчеләрне гаҗәпләндерә. Монда текә тау битләрендә сирәк һәм юкка чыга торган бик күп үсемлек төрләре – каурый кылган, кыяклы суган, озын яфраклы тургай тарысы, алксыл-сары ялмача, кара җимешле кызылча, Гмелин тәңкәяфрагы, матур җибәләй һәм башкалар булган эшкәртелмәгән чирәмле участоклар сакланып калган.
Урманнарда имән, өрәңге, юкә һәм каен үсентеләре, карама һәм усак таралган. Куаклар һәм кыяклылар белән аралашкан реликт наратлыклар да очрый.
Хайваннар дөньясы исә Урта Идел буеның дала һәм урман-дала фаунасын тәкъдим итә. Монда 70 кә якын кош төрен, шул исәптән ТР Кызыл китабына кертелгән кошларны очратырга мөмкин. Алар арасында кыр һәм болын карчыгасы, колаклы ябалак һәм төкле аяклы ябалакны очратырга мөмкин.
Имезүчеләрдән үр куяны, төлке, янутсыман эт һәм дала көзәне яши. ТР Кызыл китабына кертелгән төрләрдән дала тычканын һәм Эверсманн әрләнен билгеләп үтәргә мөмкин. Европа байбагының күпләп урнашуы аеруча кызыксыну уята. Тыюлык территориясендәге чершалы байбак колониясе – республикада иң зурысы һәм анда 2000 гә кадәр байбак яши.
Бөҗәкләр дөньясы да бай. ТР Кызыл китабына кертелгән сирәк төрләр арасында зур таллык переливницасы, адмирал, хуҗабикә аю күбәләк, элпәканатлылардан пастинкасыман тешле төклетура һәм йонеллюс бар.