Татарстанда спорт орнитологиясе буенча беренче ярышлар узды
«Чиста болыннар» комплекслы профильле дәүләт табигать тыюлыгы территориясендә республикада җирле хайваннар һәм үсемлекләр дөньясын фотога төшерү буенча беренче квест узды.
Стартка район блогерларының өч командасыннан 9 кеше чыкты. Алты сәгать эчендә катнашучыларга акчарлакларны, челән, торна, аккойрык бөркетне һәм башка күп төрле кошларны, шул исәптән Татарстан Республикасының Кызыл китабына кертелгәннәрен дә күрергә һәм фотога төшерергә кирәк иде.
«Бердинг (табигатьтә кошларны күзәтү) ярышларын без беренче тапкыр үткәрәбез. Бу балалар өчен табигатькә чыгу, рәсми булмаган шартларда аралашу һәм бер үк вакытта ярышлар һәм спорт көрәше рухын тою өчен бик яхшы мөмкинлек. Бинокльләр һәм камералар рәвешендә кирәкле җиһазлары булган егетләр искиткеч нәтиҗәләр күрсәттеләр. Бердинг буенча ярышлар аларга кошларның яңа төрләрен белергә мөмкинлек бирде», – дип билгеләп үтә заказник башлыгы Максим Улыбин.
Елга буйлап йөргәндә, блогерлар яраткан эшләрендә ярышып кына калмадылар, ә Прость һәм Чулман елгаларының тал, каен һәм усак катнашмалы имән урманнарының искиткеч күренешеннән ләззәтләнделәр.
«Бу бик кызыклы ярышлар булды! Күрәсең, тирә-якта шулкадәр күп кошлар бар икән, ә без чыпчыклар һәм песнәкләрдән башка берсен дә күрмибез. Хәзер безнең орнитологик күзаллауларыбыз шактый киңәер дип ышанам. Безнең өчен аеруча кызыклысы тирә-яктагы үсемлекләр – чиста ак төнбоек, сары төнбоек, очлы яфраклы һәм тупас яфраклы су кәбестәләре булды. Күзаллауларны киңәйтү һәм районыбызның бер акваториясендә йөрү мөмкинлеге биргән өчен оештыручыларга зур рәхмәт», – дип тәэсирләре белән уртаклаша блогерлар.
Белешмә:
Бердинг, яки спорт орнитологиясе – табигатьтә кошларны күзәтү. Аның бурычы – кошны эзләп табу, күзәтү, өйрәнү, нинди төргә караганын билгеләү. Һәм мондый бурыч бер үк вакытта берничә командага бирелә, аларның һәрберсе иң яхшысы булырга омтыла.Аның белән мавыгу кошларның гаҗәеп дөньясы белән очрашулардан искиткеч тәэсирләр туплауга охшаш.