«Тикшерелгән бизнес» интернет-порталында «Кире элемтә модуле» эшли башлады
«Кире элемтә модуле» интерактив сервисы «Тикшерелгән бизнес» интернет-ресурсында эшли башлады. Сервис үткәрелгән тикшерүләр һәм профилактик визитлар нәтиҗәләре буенча бизнеска кире элемтә бирергә мөмкинлек бирә. «Кире элемтә модуле» – Татарстан Икътисад министрлыгына бизнесның инспектор визитыннан канәгать булу дәрәҗәсен аңларга, тикшерүләр һәм профилактик визитлар үткәргәндә күзәтчелек органнары тарафыннан кертелгән хокук бозуларны ачыкларга мөмкинлек бирә торган кыска анкета. Сораштыру белән «Тикшерелгән бизнес» сайтында танышырга мөмкин.
Исегезгә төшерәбез: бизнеска законнарның гамәлдәге таләпләре турында оператив мәгълүмат бирү өчен 2017 елдан ТР Икътисад министрлыгы һәм Татарстан Республикасы Прокуратурасы инициативасы белән төзелгән «Тикшерелгән бизнес» интернет-порталы эшли.
Проектның контроль (күзәтчелек) органнары белән үзара бәйләнеше җайга салынган, алар проблемалы мәсьәләләрне җентекләп аңлаталар, типлаштырылган хокук бозулар һәм аларны булдырмау ысуллары турында мәгълүмат белән уртаклашалар. Шуның нәтиҗәсендә сайтта эшкуарлар өчен файдалы белемнәрнең уникаль базасы тупланган: якынча 1 350 типлаштырылган хокук бозу һәм аларны булдырмау ысуллары, контроль (күзәтчелек) органнары белән хезмәттәшлек барышында эшкуарларда барлыкка килгән тормыш ситуацияләре буенча 1 300 дән артык сорау-җавап.