Республикада коткарылган төп 5 төр кош һәм аларны кайда очратырга мөмкин

Бүген бөтен дөньяда Халыкара кошлар көне билгеләп үтелә. Ул кошларның төр төрлелеген һәм санын саклау кирәклегенә игътибар җәлеп итү уңаеннан үткәрелә.

Бу бәйрәм көнендә ТР Биоресурслар буенча дәүләт комитеты ТР һәм РФ Кызыл китапларына кертелгән канатлылар вәкилләре турында сөйләргә карар итте: еш кына коткару тарихларының «геройлары» булган кошларны кайда очратырга мөмкин?

Колаклы ябалак. Әлеге төр урман белән тыгыз бәйләнгән һәм төрле тип урманнарда очрый, ләкин күбрәк ыслы массивларга өстенлек бирә. Урманнардан тыш, кырларны саклау һәм юл буендагы урман полосаларында яши. Аны дистәләгән торак пунктларда, Казанда Арча зиратында һәм М. Горький исемендәге мәдәният һәм ял паркында, Түбән Камада, Яр Чаллыда, Әлмәттә, Кукмарада очратырга мөмкин. Озын койрыклы ябалак – чын ябалаклар гаиләсеннән, ябалаксыманнар отрядына керүче кош. Еш кына шәһәрләргә очып килә, Әгерҗе, Азнакай, Актаныш, Баулы, Югары Ослан, Алабуга, Яшел Үзән, Лаеш, Түбән Кама, Балык Бистәсе һәм Чирмешән районнарында очрый. Аккойрык бөркет. Аның таралуы зур сулыклар белән тыгыз бәйләнгән. Аккойрык бөркетнең республиканың барлык районнарында Идел, Чулман, Нократ, Мишә, Зөя, Чишмә, Дала Зәе, Шушма һәм башка елгалар буенда очравы теркәлгән. Гади торымтай төрле табигый комплексларда яши ала. Мәҗбүри шарт – агач үсемлекләре, тигезлек һәм калкулыклы ландшафтлар булу. Шәһәрләрдә дә оя кора ала. Аны республиканың бөтен территориясендә очратырга мөмкин. Еш кына агачларда, башка кошларның иске ояларында, агач куышларында, кыяларда, елга һәм ермакларның текә яр буйларында, шулай ук төрле корылмаларда яши. Ысылдык аккош – үрдәкләр гаиләсе вәкиле, каз сыманнар отряды арасында иң эресе. Соңгы елларда аларны республиканың  һава-су үсемлекләре үскән эре сулыклар урнашкан барлык районнарында да очраталар.